D'Helge und Värsli vom 2018 kasch do gniesse, viel Vergniege...

Sali Zämme!!!

Will si z’Bärn die Hunde-Kurs-Pflicht abgschafft hänn
miemmer nimm folge, mache wieder was mr wänn
jetz goht d’Boscht ab, mr kenne uns vo dr Laine rysse
und im verby go em Böschtler in d’Waade bysse.

Mr singe gärn Schnitzelbängg und hänn Spass
laufe ass Bäffzgi amme dur d’Fasnachtsgass
aber s’hett e Noochgschmagg zimmlig e fahle
ass mr fir die drey Dääg no mien Hundestyyr zahle.

Alli Yysbäre sinn abgsegglet, was hesch was gisch
wo Doris Leuthard in Grönland uff em Yys gschtande isch
wäg ihrem Allwätter-Mantel und ihrem Charme däm stolze
isch hinder ihre grad en Yysbärg gschmolze.

Alli Rächnige vo minere Kosmetik, Zahnarzt und vom Gwafför
erledigt mi Maa, au die vom Schönheitschirurg und em Massör
nur machts mi verruggt, denn är heftet die Rächnige ganz stur
immer in Ordner fir Sanierig, Umbau und Reparatur.

Wo do dr Fringer Ohrefyygli bykunnt und e Gingg an d’Wade
sait d’Frau Constantin zem Maa: "Hör jetz uff mit däne Eskapade,
es isch immer nur dr Alkohol tschuld do bi dir!“
denn maint är: "No bi'n'y aber froh, ha gmaint s’liggt an mir".

Mr kemme wohrschynlig nit drumumme
und zahle halt die Hundestyyr, mir Dumme
aber s’Schlimmschte isch no, jetz wänn die Fräche
uns no'ne Hunde-Chip in d‘Larve stäche.

E Wahnsinn, was an däm Black Friday in dr Stadt so lauft
y ha denn au grad e Kaffi-Automat fir e Lappe kauft
mr hänn zwar scho Fimf in dr Kuchi stoh
aber no kai soo Ginschtigi, das Schnäppli ha mr nit lo entgooh.

Die neje Neetli sinn jo OK, aber wie gsait
friehner hani als vyyyl mee Waar uss de Lääde drait
aber hitt gitts nimm vyyl, denn muesch bedängge
ass efang iiberall so Iiberwachigs-Kameras hängge.

Mi Doggter hett gsait, y sell Sport dryybe, dä hett mr gfalle
jetz spiel y halt ganz vergiftet Tennis, in dr Halle
und y hoff schwer, y bi jo nit blöd und nit dumm
ass y denn au bald dr Doggter-Titel bykumm.

Es kryselet bi dr Bolizey, und e Krise in dr Baudep.-Fiehrig
jo iiberhaupt herrscht e Krise in dr ganze Regierig
zem Gligg isch jetz s’Bethli Ackermaa doo
denn mit Däre hett die Krise s’passende Gsicht bykoo.

Wo'n’y die Blaggedde gsee ha, hett’s mr fascht ebbis gäh
(S'Fiffi sait:" #MeToo!")
no ha mr iiberlait, sell y jetz trotzdäm Aini näh
(S'Fiffi sait:" #MeToo!")
denn wenn y se aalueg muess y jedesmol gäähne
s’hett fascht glych vyl Figure druff wie im Stücki ääne.

Mechtsch s'Video uff em Youtube-Kanal go aaluege oder bewärte, mr wurde'n'ys freue.