D'Helge und Värsli vom 2020 kasch do gniesse, viel Vergniege...

Wauwau & sali Zämme!!!

Dr Baschi Dürr tuet jetz sy Zuekunft reorganisiere är well jo nit s’ganz Läbe lang doo z’Basel regiere in ere Färnsee-Serie -- in ainere vo däne viile könnt är in „Two and a half Men“ - denn -- dr half Men spiile. 

Ych läb nit ganz Fleischfrey und au nit Läggerlifrey y läb nit ganz Alkoholfrey und au nit Glutefrey y läb nit Zuggerfrey und nit Laggdoosefrey und y läb nit Kaffi-Frey und scho gar nit Chocolat-Frey. 

Will y emol uff’s Drämmli, nämme mer mol a uffs Nummere Ains no hani Päch, denn wägere Demo kunnt denn halt kains und wägere Baustell kunnt kai 6er und kai 8er, no hani’s lo blybe und bi verruggt denn halt wieder heim, dä Värs do go schrybe. 

A propos Drämmli – im 10er ganz vorn winggt mr dr Ärnscht Born und im 2er seh’n y s’Miggeli Meyer und im 8er bi dr Tür griesst mi dr Baschi Dürr uff dr Linie 1 – seh’n’y dr Studer Heinz und im 6er s’Susi Lämmli fir was bruch ych no s’Facebook- y triff jo alli im Drämmli 

Ich habe gern die Roten und ich die Gelben ich möchte die Orangen und ich nimm dieselben ich liebe dich, wollen wir heiraten - in der Tüte? Ohjee Dasch e Usschnitt gsi vonere Kadersitzig bi dr BVB. 

Sit 60 Joor gitt’s jetz dr Bligg-dasch scho lang 350 Joor fyyrt s’Waisehuus dasch au scho lang tausig Joor alt isch s’Minschter-dasch ewig lang und 10 Joor z’lang – sait dr Stau-Hampe ändlig y gang! 

Jetz hänn’s bim Waggsfigure-Kabinett au no welle e Waggsfigur vo dr Greta Thunberg härstelle no hett ain gsait, das goht nit - das sey absurd die sey soo klimaerwärmt, dass s’Waggs grad wieder schmelze wurd. 

S’gitt E-Auti, E-Bike und die E-Trotti sinn jetz dr Kracher s’gitt sogar E-Fuessgänger, die mit eme Härzschrittmacher aber ai Erfindig gitt’s nonig, die fänd y aber guet e E-Portmonnai - wo sich dr Inhalt wieder ufflade duet. 

Me sait schyns nimm Maitlibai und au Schänggeli kasch vergässe e Sutter Begg-Furz - wenigschtens darf me se bis jetz no ässe au Schweebli und dr Schnägg sei frauefindlig- haisst’s efang Jetz muess mi dängg no schämme, wenn y am Sunntig an Frieh-Schoppe gang.

E Feminischtin sait ych sig Frauefindlig und i spinn
will mir ass zwai Möps am Bänggle sin.

Unsere "Nid"-Fasnachtsufftritt im Telebasel kasch do

https://telebasel.ch/2020/03/02/bangg-fuer-bangg-am-nit-faasnachtsmaentig-2/?channel=11078

go aaluege.

S'isch dr iiberhaupt druurigscht ufftritt gsi, ganz ohni Publikum.