D'Helge und Värsli vom 2023 kasch jetz ändlig do ko gniesse, viel Vergniege...

Das isch dr Degghelge vom 2023.

Sit em Schwingfescht z’Prattele in dr Hülfte unde
hänn’s jetz 3 neyi Schwingergriff erfunde
s’gitt dr Wyberhoogge und dr Brienzer halblang
dr Kryzgriff, dr Buur und dr Sennegang
ney isch dr Schälleunterschwung und dr Willi Tell
und dr Eva Herzog-Abwurf isch jetz aktuell.

Die Wätterschmöcker schmegge s'Wätter do und deert
au an Ameisehüffe schmegge si, ha’ni scho gheert
an de Bäum schmegge si an spezielle Sorte
si schmegge an de jääse und gruusigschte Orte
bim Kuehschwanz heisst’s, e chli stingge muess dä Pflätter
und sait, im näggschte Summer gitt's e verschisses Wätter.

Do hogg ych vor em Färnseh in de Trainerhose
entspann mi und mecht e bitz Muusig lose
s’Angebot isch jo gross in divärse Sänder
denn trälleret aini vor em Miggrofonständer
s’isch Beatrice Egli im roote Gilet
aber wenn scho Egli, denn doch lieber d’Filet.

Dr Charles isch jetz dr Keenig vo Ängland äne
bi dr Camilla könntsch maine, si haig ständig Migräne
e Jubiläum hett si no gha, si Mamme - s'Beetli
und si hänn gfyyrt und gfeschtet bi Schämpis und Baschteetli
scho 70 Joor isch si ufem Thron ghoggt, die Elisabett
dasch jo scho verfugt, wemme soooone Verdauig hett.

Wenn Tierli krank sinn tuet das aim schurig weh
aber so Pandemieä bi de Tier git’s immer mee
do git’s Schweinepescht, Rinderwahn und s’Büffelzugge
d’Vogelgrippe, Milzbrand und jetz no Tigermugge
d’Rägewürm hänn d’Magersucht drum sinn’s so schlangg
und d’Gummibärli sinn alli zuggergrangg.

Das Musicaltheater kennt me doch mit em Hallebad kompensiere
denn kennt me deert d’Wassermuusig vom Händel uffyehre
au d’Niederdorf-Opere - die fänd denn halt im Wasser statt
oder dr wyssi Hai ass Musical wär doch au no glatt
und dr folgendi Song wär fir e Musical scho parat
Nämlig: Dante Schuggi fahrt im Hallebad Motorrad.

Dr Minu goht ass in sym rote Kittel
in d’Manor go boschte bi de Läbensmittel
scho länger vermisst me ihn und gheersch so nyt
är verzellt doch so gärn Gschichtli und das fählt de Lytt
doch jetz ka’ner wieder schneere - und er stoht ganz glasse
all Daag in dr Migros an dr Plauder-Kasse.

Die Klimakläber wo sich do an Bode kläbe
wohrschyns hänn die e druurig-verpfuschts Läbe
wägem Kläber do frait sich Cementit und Araldit
aber sunnscht frait das nyemmer under de Lytt
die selle sich doch an e Flugzyg kläbe
eso kennte si doch no ihre Höheflug erläbe.

Es gäb e Lehrer-Mangel, und zwar gewaltig
die Mittailig kunnt vo dr Schuelverwaltig
es fähle Lehrkräft au im Kindergarte
und si fähle schyns in alle Schbarte
aber jetz het me entdeggt – y glaub y spinn
die fähle numme, will si wieder emol in de Ferie sin.

Dr Federer hett si Racket an Nagel ghängt
dr Feuz hett si Schyy-Dress an Nagel ghängt
dr Vettel hett si Helm an Nagel ghängt
dr Maurer hett si Grawatte an Nagel ghängt
uss Wuet muess i no an e bestimmte dängge
wenn dr Putin sich nur au an Nagel wurd hängge.

An dr WM wänn die Dytsche demonstriere
und mit’ere Armbindi hänn’s welle proteschtiere
aber d'FIFA hett's verbotte, das sey nit cool
denn stehn's aifach ane mit dr Hand vor em Muul
mit däm hänn’s nur eppis erreicht, die Alte
elf Schwoobe wo e zytlang d'Schnuure halte.

Am Fasnachts-Mittwuch hänn mr deerfe dr Schluss im Rest. Volkshuus mache!

Vyyl Vergniege!

Dr VSG-Schluss-Oobe isch e volle Erfolg gsi. Do kasch Di sälber drvo iiberzyyge.

Luegsch lieber d'Uffnahme im Youtube aa?

Do findsch s'Video uss'ere andere Perspeggtive vom VSG Schluss-Oobe!