DAS ISCH DR DEGGHELGE VOM 2015!

Mir zwai Bäffzgi hänn’s eigendlig no guet
will d’Styyre unsere Maischter zahle duet
mir hänn Kilowys Frolic aber e Zwinger hämmer kaine
sinn all Daag dusse und das ganz ohni Laine
und ass mr ko sinn – zue Eych do inn
kunnts nimm druff aa – will mr an jedere Hundsverlochede sin.

Wältwyt hänns enand Yyswasser iibere Schädel uss gleert
und das hett sich in no bleedere Arte vermeehrt
im Kindergarte mache si’s mit Bauklötz – goppeletti
und in Italie mache si’s neuschtens mit kochte Spaghetti
in Afrika hänn si’s mit Kokosnüss versuecht
und im Kino macht’s ain mit Popcorn, lägg het dä gfluecht
bi uns zwai do hämmer denn nüd me z’lache
wenn mir’s enand Dehai mit Fondue mache.

D‘Landschäftler wänn halt nid mit uns fusioniere
obwohl si vo uns Basler nur kennte profitiere
jetzt mien’s halt wyter spare und dr Stutz nid verprasse
zwor dien die rote Zahle farblig zem Rotstab basse
und wenn si s’Nitoba-Gäld nid hätte die liebe Frinde
no hätte si nid emol s’Holz zem ihri „Chienbäse“ aazinde.

Iiber d’Basler Regierig gitt’s das Joor nit vill z’lache
drum isch’s schwär, vo däre e luschtigs Värsli z’mache
iibere Wessels – und das sag ych grad diräggt
är ka zwar nyt derfir – aber s’ligt halt an sym Dialäggt
und vo dr Evi Herzog ihre Hoseglaider, däne biiedere
do hett d’Rumpel-Clique und sie glaub die glychi Schnyydere
au em Eimann gheerti wieder emol e Quittig
denn das Ei in sym Name hett scho sy Bedyttig
dr Baschi Dürr wäscht immer no all Wuche – daasch e Gladde
är hett immer vyyl Gaifer uff syne Hemmli und Grawatte
und dr Brutschin dä nimmts grad so wie’s kunnt
dä kunnt mer ass vor wie‘ne ussgsetzte Hund
und dr Nej do – dr Ängelbärger muess sich no profiliere
dä hett emol sy Doggter gmacht bim Schneekette montiere
und dr Präsidänt Guy Morin – wenn y dä ass eso gseh
kenntsch maine, das wär ain vo dr Hailsarmee
är wär jo aigentlig no e scheene Maa
aber dummerwys gseht me’n’ems halt im Gsicht nit a.

Bim Radsport nämme si Droge - wie au bi de Schwimmer - sait my Muetter
und au bim Ryttsport gheye si de Ross so Zyg ins Fuetter
bi de Schwinger – die in ihre Sennekitteli
au die nämme eso Uffputschmitteli
d’Politiker nämme Droge das hett me jetz uuse gfunde
denn umme sunscht machsch jo kai Selfie mit de Hoose dunde.

Y ha kirzlig e Färnseh ganz ginschtig kauft
und Dehai ha’ni denn gluegt was so im Schwizer lauft
aber was isch ko – dä Bachelor – y grieg fascht e Koolik
dasch dä mit de bleichte Zeehn und erscht no e Wiederhoolig
und denn no sini Dipfi, dä Mannequin-Verschnitt
die gyxe und gaxe – dass mr fascht ebbis gitt
die Aint wurd flaischlos und vegetarisch koche
me sehts au – denn s’Flaisch fählt an ihre Gnoche
e Anderi isch immer mied, die hett s’Schloofzimmersyndrom
und die Neggscht hett scho langsam Cellulitis-Symptoom
und Aini hett Probleem wägeme Bibeli uff dr Bagge
und e Anderi, däre fählt ganz aifach e Zagge

y has jo gsait – sellsch nid so’ne billige Färnseh kaufe
no wurd au e bessers Programm im Schwizer laufe.

An dr Beärdigung uff em Hörnli vom Hampe Räber
warte d‘Truurgescht vor em Grab uff e Totegräber
e halb Stund hämmer gwartet und kai Urne wyt und breit
ändlig kunnt är ko z’seggle ganz verschwitzt und sait
dr Oofe isch grad no heiss gsi und das hett mi animiert
drum hani mini Rehschnitzel no schnäll druff grilliert.

Während dr OSZE isch bi de Mässehalle
au d’Branntgass in dä Sperrbezirgg iine gfalle
denn lauft deert sone Gritte – und e Schugger hett se gseh
stoppt se – do isch gsperrt wäg dr OSZE
no maint si – scho wieder sone Epidemie und schimpft
asso kum jetz – lehnd mi duure – ych bi jo schliesslig g‘impft.

Vo dr Conchita Wurscht Figur isch my Wybli fasziniert
denn si hett sich wäge ihre Pölschterli immer schyniert
uff die Wurscht-Diät isch my Fiffi ganz versässe
sitt sächs Monet duet si numme no Glepfer ässe
y saag Eych, sone Huffe Glepfer, das gitt e Saudurscht
und abgnoo ha’ni zwor nüd, aber s’isch mr wurscht.

My Zahnarzt isch e Fasnächtler und i muess immer stuune
är isch innere Guggemuusig und spielt deert Posuune
bi dr Behandlig schiebt är immer e Gugge-CD hindere
die Muusig wurd psychologisch d’Schmärze lindere
gnitzt hett’s aber nyt, denn s’Zahnweh isch no doo
und zuedäm hani vo däm Guggesound no Grindweh bikoo.

Wotsch s'Video uf Dy Kischte laade und am Flat aaluege, no kasch es do downloade.

Viel Spass...

...oder mechtsch s'Video uff unserem Youtube-Kanal go bewärte, mr wurde'n'ys freue.