banner

portfolio

D'Helge und Värsli vom 2019 kasch do gniesse, viel Vergniege...

 

Dr Zeedel vom 2019 zem nomol aagüggsle kasch do aabe laade.


 

Wauwau!!!

 


Das stellt zwai Schugger im sälbschtfahrende Tesla dar
denn stoppt dä Tesla plötzlich, grad vor dr Pussy Bar
jetz hett er kai Strom me maint dr Aint und foht a lache
n e i i i, dä waiss doch efang gnau wo mir unsri Pause mache.

 

 

Am Sächsilüte gsehsch d’Frau Ackermaa zem Böög ane gwaggle
als Ehregascht hett’s’en deerfe aazinde mit dr Faggle
aber do hänn e baar Zunftbrieder lutt verkindet
friehner hänn d’Häxe dr Schitterhuffe nid sälber aazindet.

 


Mi Maa hett mi gfroggt was mer am Sunndig koche wänn
no hani gsait, ebbis wo mer scho lang nimm gässe hänn
und wo’n’en eso aalueg, hani miesse lache
mer könnte jo wieder emol e suure Mogge mache.

 

 

Wo YB Maischter worde isch hänn si sich an Basel gwändet
und em FCB e Entschuldigungs-Schrybe gsändet
und derzue no e Guetschyyn, schwarz uff wyss
fir e Wuche Trainingslager z’Bärn im Stade de Suisse.

 

 

Drey Fraue hett‘s aggtuell im Bundesroot insgesamt
au d‘Martullo-Blocher spegguliert jetz uff das Amt
aber d’Fraue-Quote wurd denn allem aa
bi däre nit styyge, die gältet jo als Maa.

 

 

Bis zletscht fahrt dr Dreyer no bis Millhuuse
bis zletscht fahrt dr Achter bis zem Hornbach uuse
bis zletscht fahrt dr 14er bis Lieschtel, s‘wär glatt
denn mien d’Rambasse nimm mit em Traktor in d’Stadt.

 

 

Dytschland isch Fuessball-Wältmaischter, dasch dr Bescht
aber y main nid jetz, dasch scho länger här und Schnee vo gescht
wenn y dä Värs aber in vier Joor wieder sing
isch’s denn no vyyyyl länger här, wo die Wältmaischter worde sinn.

 

Y ha Bekannti, die ässe Käfer, Wirm, Kakerlake und Maade
no hani die kirzlig zum Ässe bi mir Dehaim yglaade
dä Spruch wo me immer heert hani drum nit vergässe
bi mir do kennet ihr abem Bode ässe.

 

 

Scho 90 Joor alt isch d‘Mikey Maus vom Disney Walti
au d’Somaruga fyyrt, dasch zwor noni sone Alti
si fyyrt d’Änderig vo ihrem Titel, däm Glatte
in die wyblig Form vo BUNDESRAT in BUNDESRATTE.

 

 

Die Hornkueh-Abstimmig macht mer hitt no Mieh
also ych bi eigentlig fir hornloosi Kieh
denn y fänd’s jo nit luschtig bim Ässe am Disch
wenn im Hörnli-Haschee no sone Horn dinne isch.

 

 

Wo dr Xhaka mit däm Zaiche ibers Spiilfäld schryttet
hetts gheisse, dass das gar nit e Doppeladler bedyttet
er hett nur em Mannschafts-Koch e Zaiche gmacht
är welli nur zwai Mischtgratzerli zem Znacht.

 

 

 

 

 

 

...oder mechtsch s'Video uff unserem Youtube-Kanal go positiv bewärte, mr wurde'n'ys freue.

 

 

 

 

 


© 2024 bäffzgi.ch - Alli Rächt vorbehalte.