D'Helge und Värsli vom 2022 kasch do gniesse, viel Vergniege...

Ych mecht’s Eych zerscht saage - ohni e Wangg
mir sinn kai Schnitzelbangg me, numme no’ne Bangg
das Wort «Schnitzelbangg» muesch jetz aifach vergässe
denn d’Bäffzgi hänn in dr Quarantäne d’Schnitzel gfrässe.

Im Baselbiet umzingled mi kirzlig e Rudel Wölf
ha aber kai Angscht gha, doch immerhin sinns scho 12
aber wo no dr 13. Wolf aane springt
hani doch no Angscht bykoo, will jo 13 Ungligg bringt.

Die Alte kemme wieder, au d’Gruppe ABBA isch wieder koo
und dr Gottschi vom «Wetten, dass...» isch au wieder doo
mer sinn’s jo efang gweehnt, ass all dä Urzyt-Schund
im Schwiizer-Färnsee au allbott wieder kunnt.

Paarschipp losst in dr Wärbig verlute
es verliebe sich zwai Mensche alli 11 Minute
eb das em Bettfädere-Fischer und dr Frau Sadi gfalli
isch nit bekannt, aber mer hänn jo jetz d’EHE fir alli.

In de Läde wird efang vill klaut und gstohle
wemme se verwitscht kunnt se d’Bolizey ko hole
wenn aber in dr IKEA ain klaut und no umme peeblet
wird dä in däm Möbelhuus aifach zimpftig vermeeblet.

Jetz selle d’Fraue in dr Armee neyi Glaider bykoo
s’Mässer hänns scho und e neu’s Outfit wurd ne stoo
statt so dyyri Klamotte könnt me au - ohni z’gschbasse
däne Grytte aifach numme e Tarnkappe verbasse.

Dr Federer hett’s gschafft immene Globi-Buech z’stoo
und är hett’s gschafft, Boscht hett en uff e Briefmargge gnoo
denn gitt’s no e Federer-Drämmli, s’isch saagehaft
und als Hehepunggt hett er’s no bi uns uff e Helge gschafft.

Mi Maa nimmt’s gnau mit em Abstand yyhalte
aber är ibertrybts mänggmol - mi Alte
vor Allem wenn är zem Byyspiil uff’s Hyysli goot
und bim brinzle e Meter fuffzig vor dr Schissle stoot.

Es koschtet Millione, aber si laischte sich’s ohni z’lyege
in dr Raggeete e bitz im Wältall umme z’flyege
mir laischte uns drfir langi Färnseh-Eebe mitenand
und luege “Eisenbahnstrecken der Schweiz“ im Fyehrerstand.

Alli Parggblätz vor em Hörnli selle ewägg, die spinne
s’gitt nur no Duurparggblätz, y main die dinne
jetz muesch halt tschumple oder «mr sinn mit em Velo do»
und dr Bschtatter gsehsch mit em Sarg uff em Päggliträger ko.

De Affe und Primaate hänn’s welle s’Grundrächt gäh
me wurd se eso vermenschliche und ene “ s’Dierli sy” näh
s’gitt zwor scho so vermenschlichte Affe wo me jo kennt
das sin die, wo sich sythär Zircher nennt.

Unsere Ufftritt, wo mr am Fasnachts-Zyschtig im Zäänte-Käller (Basler Marionettentheater) gmacht hänn...

Vyyl Vergniege!

...und am glyche Daag, aifach e weeneli speeter in dr Valhalla-Bar live bim Tele Basel.

Au ganz vyyl Vergniege!

Luegsch lieber d'Uffnahme im Youtube aa?

Do findsch dr Zäänte-Bar Ufftritt!

Au dr Ufftritt in dr Valhalla-Bar kasch uff Youtube go aagüggsle.