portfolio

D'Helge und Värsli vom 2024 kasch jetz ändlig do ko gniesse, viel Vergniege...

Dr Zeedel vom 2024 zem nomol aagüggsle kasch do aabe laade.

Das isch dr Degghelge vom 2024.

Dr Strom isch efang dyyr und zimmlig knapp
si stelle’n’en villicht emol bletzlig ab
ych ha vorgsorgt und ha e Staubsuuger kauft
und zwar aine wo ohni Kabel lauft
wenn’s kai Strom het, haut’s mi nid uss de Fuege
ych ka jo au bi Keerzeliecht Färnseh luege.

Dr Kevin sait zem Omi Edeltraut
jetz ha’ni mit mym Auti e Huffe baut
mit Alkohol am Styyr, das isch e Drägg
jetz nämme die mir s’Billjee wägg
bewirb Di doch het si schbontan d’Idee
ass Chauffeur bi dr BVB.

Dr Howard Carpendale, wär kennt’n nid dä Maa
dä hett do e Härzattagge uff dr Biihni gha
denn hänn’s en sofort um s’Härz massiert
und mit em Defibrilator reanimiert
wo’n’är wiederbeläbt isch nach däre Pain
het’r d’Auge uffgmacht und gsait, «Hello again».

D’Frau Gass het d’Frau Schild droffe bim schbaziere
no maint si, was saage si au zu däne vyyle Yybrüch wo immer bassiere
no sait d’Frau Schild, i mag hit nid schneere, y ha so Kopfweh s’isch zem gruuse
dr Doggter het zwor gsait ych sell z’Nacht bi offenem Fänschter pfuuse
het’s nyd gnitzt, isch’s Kopfweh nid ewäg, Frau Schild
nai, nid ewägg, aber wäg däm offene Fänschter drfir my Portemonnaie und e Bild.

Im Wältruum sinn d’Aschtronaute wie wild am Schaffe
denn verliere si s’Wärggzüg, die blöde Affe
jetz fliegt die Kischte um d’Ärde umme
mit däm Wärggzüg dinn vo däne Dumme
aber s’Schlimmscht isch halt fir die Spezialischte

ihres Znüni liggt au no in däre Kischte.

Unseri Noochberslyt, e älters Ehepäärli
är haisst Päuli und si nennt sich Marie-Klärli
si sin nid immer glycher Mainig die Zwai
drum hänn si zwischeduure au Lämbe Dehai
fryehner het är zu ihre gsait, kaine liebt di eso wie’n’ych
und hit sait är, kain liebt Di, wieso aigendlig ych?

Es gitt e Huffe Löcher, wie s’Globus-Loch
s’gitt e Muusloch, e Bohrloch und s’Januarloch
s’gitt e Schlisselloch, e Gnopfloch und s’Naseloch
s’Ozonloch, s’Schlagloch und s’Gotthard-Loch
denn no s’Loch im Ämmidaler dinn
am Schluss kunnt mer nur no dr Putin in Sinn.

D'Barbie hett sich gmolde bi Bauer sucht Frau
do sait dr Bräntehueber-Sepp, aber bitte im Stall kai Modeschau
si sell mol im Gaissestall go iine gnaisse
deert passt si jo guet zu de magere Gaisse
Schmätterling im Buuch hett dr Sepp kaini, aber zwor
hett er jetz e rosarote Hof und e pinkige Traktor.

Au e Bundesroot kennt emol, das wär no glatt
in’ere Färnseh-Show mitmache ass Kandidat
d’Frau Amhärd zem Byschbil, eso zem Gschbass
ass Hochdytsch-Expärtin im «Wetten dass,...»
dr Beat Jans kennt bi «1 gege 100» s’Beschte gäh
und dr Parmelää wurde si grad no bi «Bares fir Rares» näh.

Uff dr Dreyroosebrugg hänn die Gladde
eso Pflänzli pflanzt schyyns wägem Schadde
mit däne Minipflänzli hänn si’s nid ganz braicht
wo’ni das seh ha’ni vor lache grad in d’Hoose gsaicht
das het nyd mit kinschtliger Intelligänz z’due, die Pflanzerey
s’isch ainzig und elai d’Intelligänz vo dr Stadtgärtnerey.

...und no'ne spezielle extra Helge fir an dr Binniger Fasnacht!

Will, s'Fiffi isch im 2024 d'Blaggedde-Kinschtlere vo Binnige gsi.

Dr Bäffzgi het e riese Stolz im Ranze!